Parlamenti Europian shpalli mbrëmjen e djeshme rezultatet e votimeve në tërësi për vendimet e miratuara, ku bën pjesë dhe rezoluta “Ballkani Perëndimor“.
Një rezolutën e miratuar, përfshihen edhe 15 kushtet e Bashkimit Europian që duhet të përmbushë Shqipëria para konferencës ndërqeveritare dhe para fillimit të negociatave.
Rezoluta mori edhe më shumë vota, sesa kur u miratua në parim.
Nga 388 vota, që u raportuan në fillim si pro, rezoluta kaloi me 532 vota pro, 70 vota kundra dhe 63 abstenime. Në votim ishin 665 eurodeputetë.
Shumica prej 76% tregon një konsensus të gjerë në Parlamentin Europian për zgjerimin në Ballkan, por edhe për kushtet që duhet të përmbushë Shqipëria përpara konferencës së parë mdërqeveritare për nisjen e bisedimeve.
Kushtet u vendosën nga Këshilli Europian me propozimin e Gjermanisë, Francës, Hollandës, Danimarkës dhe Spanjës në mars të këtij viti.
Kryeministri Edi Rama në një reagim të tij tha se nuk ka 15 kushte për nisjen e bisedimeve të para ndërqeveritare mes BE dhe Shqipëri, sikundër u shpreh se rezoluta u miratua me votat e aleatëve të PD në Parlamentin Europian, pra jo me konsensus.
Në fakt rezoluta duket se ka marrë një konsensus në mbi 76 % të europarlamentarëve, ku votat kundër janë vetëm 70, ndërsa abstenimet 63.
Kushtet janë si më poshtë:
Plani me 15 pika i Integrimit:
1- Miratimi i reformës zgjedhore
2- Funksionimi i Gjykatës Kushtetuese
3- Funksionimi i Gjykatës së Lartë
4- Finalizimi i ngritjes se strukturave kundër krimit të organizuar dhe anti-korrupsionit/Funksionimi i SPAK
5- Forcimi i luftës kundër korrupsionit dhe krimit të organizuar, në bashkëpunim me vendet anëtare dhe nëpërmjet Plan Veprimit për adresimin e krimit financiar
6- Ulje e numrit të azilkërkuesve, ku një nga masat është bashkëpunimi me Hollandën, Francën, Britaninë e Madhe, Gjermaninë, Italinë, Irlandën. Vazhdimi i Zbatimit të Planit Ndërinstitutcional të Veprimit për parandalimin e azilkërkimit të qytetarëve shqiptarë në vendet e Schengenit
7- Rishikimi i Ligjit të Medias në linjë me rekomandimet e Komisionit të Venecias
8- Vazhdimi i Reformës në Drejtësi
9- Prova të vazhdueshme – Iniciimi dhe përfundimi i proceseve gjyqësore të shkallës së parë të zyrtarëve të lartë dhe politikanëve.
10- Progres në reformën e administratës publike.
11- Zbatimi i reformës zgjedhore ku përfshihen, financimi transparent i partive dhe administrimi i paanshëm i procesit dhe procesi i rregullt.
12- Vendimi për ligjshmërinë e zgjedhjeve lokale 2019 që kërkon plotësimin e Gjykatës Kushtetuese.
13- Miratimi i Akteve nënligjore të Ligjit për Pakicat Kombëtare ku janë disa VKM.
14- Miratimi i Ligjit (të amenduar) të Censusit
15- Avancimi i procesit të regjistrimit të pronave
