Kina ka publikuar të dhënat e sekuencës së gjenomit për koronavirusin që është përhapur së fundmi në Pekin dhe zyrtarët thonë se kanë identifikuar një gjurmë europiane në studimet fillestare.
Kina, që është gjendur nën presion për të publikuar të dhënat më herët, bëri të ditur se i ka dërguar ato tek Organizatat Botërore e Shëndetësisë.
Administrata e SHBA ka fajësuar qeverinë kineze për mostrajtimin siç duhet të infeksionit të parë dhe me lëvizjen e ngadaltë të përmbajtjes së epidemisë. Kina ka hedhur poshtë akuzat, duke bërë të ditur se nuk ka humbur kohë në publikimin e informacionit mbi epideminë, përfshirë sekuencën e gjenomit të Covid-19 të përhapur në Vuhan.
Mbi shfaqjen e fundit të virusit në Pekin, OBSH ka bërë të ditur se është informuar nga autoritetet kineze mbi hetimet drejt burimit të vatrës. Organizata kërkoi që sekuenca gjenetike të publikohet sa më shpejtë të jetë e mundur.
Sekuenca e gjenomit u publikua të Enjten në mbrëmje dhe është ndarë me OBSH, sipas Qendrës së Kontrollit dhe Parandalimit të Sëmundjeve në Kinë. Sekuenca e gjenomit të virusit është e rëndësishme në diagnostikimin e sëmundjes dhe për të kontrolluar koronavirusin e ri. Detajet e publikuara në Qendrën Kombëtare të të Dhënave Mikrobiologjike, shfaqën të dhënat mbi gjenomin në Pekin të bazuar në 3 prova, 2 njerëzore dhe 1 mjedisore, të mbledhur me 11 Qershor.
Kjo ishte dita që kryeqyteti kinez raportoi rastin e parë lokal të Covid-19 në disa muaj. Që prej atëherë, Pekini ka raportuar një total prej 183 rastesh, të lidhura me tregun ushqimor në jugperëndim të qytetit.
“Sipas studimeve filletare, virusi është nga Europa, por është ndryshe nga virusi që po përhapet aktualisht në Europë, pasi është më i vjetër”, deklaroi Qendra e Kontrollit dhe Parandalimit të Sëmundjeve.
