Vaterpolisti i njohur hungarez Tibor Benedek, ka ndërruar jetë sot në moshën 48-vjeçare.
Lajmin e ka bërë të ditur Federata e Vaterpolos e Hungarisë, e cila është shprehur e pikëlluar si dhe i ka ofruar ngushëllime familjarëve të të ndjerit.
Ai ishte njëri prej sportistëve më të popullarizuar në Hungari, por ishte sëmundja ajo që e pengoi në shumë objektiva që kishte dhe e detyroi në muajin maj të largohet nga çdo aktivitet sportiv.
Benedek është kampion i trefishtë olimpik, ndërsa ka fituar dhjetëra tituj lokalë e ndërkombëtar. Pas medaljeve të arta olimpike të fituara me Hungarinë më 2000, 2004 e 2008, ai po ashtu fitoi edhe tituj të botës e të Evropës.
