Kushtet në konvikte, studentja: Ka probleme me ngrohjen, dushet dhe higjienën

Konviktet në Qytetin Studenti në Tiranë mbeten shqetësim për studentët që vendosen atje për shkak të kushteve që ato kanë. Sipas një pyetësori me 200 studentë, të realizuar në muajin shkurt nga organizimi Qëndresa Qytetare, shumica e të pyeturve janë ankuar për kushtet e higjienës dhe mjediseve të godinave. Studentët kanë probleme me oraret e dusheve, me ngrohjen dhe çmimet e larta të mensave.

Për të diskutuar për këtë anketë, studentja Tea Zeqaj ishte e ftuar e gazetares Esmeralda Mulaj në Euronews Albania.

Zeqaj tha se ishte studente e masterit për Administrim Publik dhe kishte 5 vite që banonte në Qytetin Studenti. Ajo tha se anketa lindi si nevojë e vazhdueshme e studentëve për problematikat e hasura ndër vite.

“Identifikuam si fillim një grup përfaqësues dhe me ndihmën e tyre dolëm në terren për t’i pyetur studentët. Nga anketa rezultuan disa probleme që i kishim identifikuar dhe më parë si mungesa e ngrohjes, mensës publike, aktiviteteve sociale dhe sportive,” – tha Zeqaj, e cila u shpreh se ka gjetur mbështetjen e shumë studentëve për nismën.

Një student paguan 4500 lekë në muaj për rezidencën në konvikte dhe për periudhën 10 mujore totali shkon në 45 mijë lekë.

“Dhomat janë nga dy ose nga tre persona, varet nga situata. Për një student që vjen në Tiranë kjo shumë mund t’i duket relativisht e vogël, por ta krahasojmë me shifrat që paguhet në rajon, kjo është shumë më e lartë se studentët në Kosovë që paguajnë 40 euro në muaj për akomodimin dhe 15 euro për mensat publike për 2 vakte në ditë gjë që në Tiranë nuk ofrohet,” – u shpreh Zeqaj teksa theksoi se ngrohja është problemi kryesor i studentëve, të cilët detyrohen të marrin me vete nga shtëpitë ngrohëse.

LEXO EDHE  Video epike/ ‘Edhe fëmijët i tromaks, vetëm Luli e do’

“Sistemi elektrik mbingarkohet nga fakti se studentët marrin ngrohëse, soba, apo dhe frigoriferë për të gatuar edhe në dhomë, gjë që mund të shtojë rrezikun nga zjarret. Çdo ditë ne ndihemi të rrezikuar dhe një zjarr i mundshëm nuk do të mund të përballohej në kushtet aktuale që kanë konviktet,” – shtoi studentja.

Në Qytetin Studenti jo të gjitha konviktet kanë dushe në çdo kat, çka nxit vendosjen e orareve të përgjithshme dhe kjo ndikon që studentët të kenë edhe këtë si problematikë më vete.

Zeqaj i tha gazetares Mulaj se ka pasur kontakt me Drejtorinë e Qytetit Studenti, sidomos gjatë periudhës së pandemisë, për çështjen e tarifave në kushtet kur shumë studentë u detyruan të ktheheshin në shtëpitë e tyre.

“I drejtuam drejtorisë dhe Bashkisë Tiranë një peticion me 332 student ku kërkonim kthim të tarifës ose rivlerësim për vitin e ardhshëm. Kemi marrë përgjigje pozitive, por vetëm pas zërit që ngritëm ne, nuk ka pasur njoftim paraprak në asnjë lloj hapësire të drejtorisë që me sa duket të vetmin funksion që ka është t’i bëjë jehonë funksioneve të Bashkisë dhe jo shërbimeve që duhet të marrim,” – u shpreh Zeqaj e cila tha se për 2 muajt që studentët u larguan kanë 3 mundësi, ose kthimin në llogaritë e tyre bankare, ose të rivlerësohet, ose do të shtyhen.