Një person është vënë në pranga ndërsa një tjetër është proceduar penalisht nga policia e Fierit në kuadër të operacionit “Paketimi” pasi akuzohen për prodhim dhe shitje të lëndëve narkotike.
Pas hekurave ka përfunduar shtetasi K. C., 41 vjeç, ndërsa është proceduar penalisht në gjendje të lirë shtetasi T. Dh., 53 vjeç, të dy banues në Lushnjë.
“Në lagjen “Kadri Qystri” Lushnjë, shërbimet e Policisë kapën në flagrancë shtetasin K. C., i cili do t’i shiste lëndën narkotike të bërë gati në doza, shtetasit T. Dh. Gjatë kontrollit në banesën e shtetasit K. C, u gjet dhe sekuestrua sasia e lëndës narkotike 865 gram cannabis sativa, një pjesë e së cilës ishte e ndarë në 114 doza, gati për shitje. Gjithashtu u sekuestruan në cilësinë e provës materiale një peshore elektronike që shërbente për të bërë gati në doza të vogla lëndën narkotike, një aparat celular dhe një sasi parash.” thuhet në njoftimin e policisë.
Materialet i kaluan Prokurorisë pranë Gjykatës së Shkallës së Parë Lushnjë, për veprat penale “Prodhimi dhe shitja e narkotikëve” dhe “Nxitja për përdorimin e drogës”.
https://www.facebook.com/policiashtetitshqiptar/videos/255681429059217/
