Instituti i Statistikave publikoi të parin tregues të matshëm, që dëshmon efektin e krizës së koronavirusit në kërkesën e brendshme. Për tremujorin e parë të vitit 2020, indeksi i shitjeve me pakicë pësoi rënie me 0.4% krahasuar me të njëjtën periudhë të vitit të kaluar. Kjo është hera e parë që nga viti 2012 që shitjet me pakicë në ekonomi pësojnë rënie. Krahasuar me tremujorin paraardhës, ky tregues i përshtatur sezonalisht ka pësuar rënie 4.3 %, ndikuar kryesisht nga muaji mars.
Në analizën e Instat, produkti që ka pasur ndikimin kryesor në uljen e shitjeve me pakicë në ekonomi kanë qenë karburantet. Shitja e hidrokarbureve pësoi rënie vjetore me 6.1%. Kjo u përkthye me një kontribut negativ me -1.7 pikë përqindje në ndryshimin vjetor të shitjeve me pakicë.
Nga ana tjetër, ashtu siç pritej, shitjet e produkteve ushqimore nuk pësuan rënie, madje u stimuluan nga epidemia, sidomos në javët e para të karantinës. Sipas Instat, shitjet u ushqimeve dhe pijeve u rritën me 5% kundrejt tremujorit të parë të vitit të kaluar. Kontributi i këtij grupi në ndryshimin vjetor të indeksit të shitjeve ishte pozitiv me 1.3 pikë përqindje.
Shitjet me pakicë janë ndër treguesit kryesorë të tërthortë të ecurisë së konsumit në ekonomi. Një ecuri negative e tyre reflekton rënie të konsumit, që është komponenti kryesor në krijimin e vlerës së shtuar në ekonomie dhe jep mbi 80% të kontributit total në Prodhimin e Brendshëm Bruto./ SCAN
