Gazetari Genc Burimi, i ftuar në “Tempora” në RTV Ora tha se nuk mund t’u ndalosh partive që të martohen në koalicione parazgjedhore, kjo është një çmenduri.
Burimi shtoi se Rama nuk mund ta komprometojë këtë rast të artë për hapjen e negociatave, sepse Gjermania merr kryesinë e BE-së në 1 korrik dhe do që ta kryejë shpejt këtë proces.
Genc Burimi: Nga ana racionale nuk mund t’u ndalosh partive që të martohen në koalicione parazgjedhore. Kjo është një çmenduri që nuk e kam dëgjuar ndonjëherë. Çmenduria e dytë është se sot Shqipëria është më afër se kurrë për një marrëveshje për hapjen e negociatave.
Rrota e historisë është kthyer pas, sepse para një viti e gjysmë Franca e bllokonte dhe Gjermania e shtynte, ndërsa sot Franca e shtyn dhe Gjermania e bllokon. Kjo është cinike. Si e merr Rama guximin ta komprometojë këtë rast të artë? Sepse Gjermania do ta marrë kryesinë e BE-së në 1 korrik dhe do që të kryejë shpejt këtë proces. Nëse Rama luan me këtë gjë dhe kërkon të prish koalicionet, do të ketë gjurulldi politike në Shqipëri.
