Klubi francez i Dijonit ka bërë të ditur se nuk do të ushtrojë të drejtën e blerjes për sulmuesin Stephy Mavididi dhe për pasojë 22-vjeçari do të kthehet te Juventusi.
Mavididi iu bashkua Dijonit nga Juventusi në gusht të vitit të kaluar në formën e huazimit, ndërsa klubi francez kishte të drejtën e blerjes për 5 milionë euro por diçka e tillë nuk do të ndodhë.
Diçka të tillë e ka konfirmuar vetë presidenti i klubit francez, Olivier Delcourt, i cili është shprehur i zhgënjyer nga lojtari.
“Jam me të vërtetë i zhgënjyer nga kjo situatë. Klubi investoi për atë lojtar, e lejuam të luante rregullisht në Ligue 1 dhe besuam te ai.”
“Aktualisht po vëzhgojmë lojtarë të cilët dëshirojnë të luftojnë për klubin tonë. Dua lojtarë që të jenë konkurrues dhe të japin gjithçka në fushë.” – ka thënë Delcourt.
Sulmuesi 22-vjeçar anglez ka shënuar tetë gola në 30 ndeshje për Dijonin këtë sezon.
