Një rekord i ri është shënuar këtë të martë për sa i përket rasteve të reja me koronavirus. Sipas Ministrisë së Shëndetësisë, janë 82 raste pozitive në Tiranë, Shkodër, Fier, Vlorë, Korçë dhe Durrës.
Numri i të infektuarve aktivë, nga 499 që u fiksua një ditë më parë, sot shënohet 571. Gjatë 24 orëve të fundit janë shëruar 9 qytetarë, duke e çuar numrin e të shëruarve që nga fillimi i epidemisë në 1064.
Shifra që nuk ka ndryshuar janë shtrimet në spital, që mbetet 50, ashtu si një ditë më parë.
Bilanci i ri
Marjeta Dervishi nga Instituti i Shëndetit Publik informoi për bilancin e përditësuar. Ajo theksoi se rastet ditore të identifikuara pozitive po vijojnë të rriten, ndërsa shtoi se vihet re se është ulur vigjilenca dhe moszbatimi i rregullave të përcaktuara.
“Gjatë 24 orëve të fundit janë kryer 364 testime për të dyshuar të prekur me Covid19, nga të cilat janë konfirmuar 82 raste pozitive, kontakte të rasteve te konfirmuara më herët pozitive, si dhe raste te reja në proces hetimi në Tiranë, në Shkodër, Fier, Vlorë, Korçë dhe Durrës. Shpërndarja gjeografike e të prekurve në 24 orët e fundit është si vijon: 28 të prekur në Tiranë, 18 në Shkodër, 10 në Krujë, 8 në Durrës, 7 në Vlorë, 3 në Kamëz, nga 2 raste në Kukës, Elbasan, Fier dhe nga 1 I prekur në Korçë dhe Pukë”, tha Dervishi.
“Gjatë 24 orëve të fundit janë shëruar 9 qytetarë, duke e çuar numrin e të shëruarve që nga fillimi i epidemisë në 1064. Ne 24 orët e fundit ka ndërruar jetë një pacient 68 vjeç nga Puka, i cili vuante nga spok dhe ishte ne gjendje te rende i intubuar prej disa ditësh. Pavarësisht përpjekjeve të stafit mjekësor 68 vjeçari nuk ka mundur të mbijetojë. Aktualisht në spitalin infektiv po marrin shërbim 50 pacientë, 8 prej tyre janë në terapi intensive, ndërsa 2 janë të intubuar. Në vendin tonë janë aktualisht 571 persona aktivë me COVID19, kryesisht në Tiranë, Shkodër, Krujë”, shtoi ajo.
Apeli
Ministria e Shëndetësisë dhe Mbrojtjes Sociale apelon të respektohen masat e vendosura. Mbajtjen e maskës e cilëson domosdoshmëri, nëse nuk respektohet distanca fizike.
“Të nderuar qytetarë, nisur nga fakti se ditët e fundit po vihet re shtim i rasteve ne aktivitete biznesi, institucione publike dhe private, ndërmarrje me shumë punëtorë, etj, i bëjme apel të gjithëve: Ju lutemi respektoni rregullat. E vetmja mënyrë për të ndaluar përhapjen e infeksionit është duke ruajtur distancën fizike, duke ruajtur higjienën personale, bizneset dhe institucionet duke respektuar protokollet e përcaktuara. Në këto kushte është domosdoshmëri mbajtja e maskës në ambiente publike kur nuk është e mundur të ruhet distanca fizike. Kujtojmë edhe një herë se çdo rast i identifikuar pozitiv, duhet të vetëizolohet dhe se shkelja e rregullave nga kushdo do të konsiderohet rrezik për jetën dhe shëndetin e të tjerëve. Virusi është akoma mes nesh dhe për sa kohë nuk ka një vaksinë, qytetarët duhet të përshaten me normalitetin e ri dhe të përshtasin sjelljen e tyre duke u kujdesur për zbatimin strikt të çdo rregulli të vendosur. Mos i neglizhoni shenjat e sëmundjes. Kontaktoni me mjekun e familjes ose telefononi Urgjencën Kombëtare në numrin 127 nëse dyshoni se ju apo një i afërmi juaj është i prekur nga Covid19”, tha ajo.
Shpërndarja gjeografike e rasteve aktive sipas MSH:
Tiranë – 271
Shkodër – 86
Krujë – 72
Durrës – 33
Kamëz – 30
Vlorë – 28
Lushnje – 12
Pukë – 11
Elbasan – 8
Fier – 6
Lezhë – 3
Kukës – 2
Tropojë – 2
Mallakastër – 2
Korçë – 2
Berat – 1
Ura Vajgurore – 1
Gjirokastër – 1
COVID-19 – Statistika (16 Qershor 2020) sipas MSH:
Testime totale – 21177
Raste pozitive – 1672
Raste të shëruara – 1064
Raste Aktive – 571
Humbje jete – 37 (Qarku Tiranë 21, Durrës 7, Fier 4, Vlorë 1, Shkodër 3, Kukës 1)
