Pas rihapjes së aktiviteteve dhe lëvizjes në vend janë shtuar edhe rastet e qytetarëve të prekur me COVID-19. Gjatë 24 orëve të fundit siç njoftoi dje Ministria e Shëndetësisë u regjistruan 57 raste të reja, ndërsa Kruja kryesonte listën e qyteteve të prekura.
Lidhur me këtë trend në rritje, Euronews Albania zhvilloi një bisedë me zv.ministren e Shëndetësisë, Mira Rakacolli. Ajo tha se këto numra kanë qenë të pritshëm, pasi me lirinë e aktiviteteve janë shtuar edhe kontaktet e njerëzve me njëri-tjetrin.
Zonja Rakacolli tha se me këto shifra nuk rrezikohet që sistemi shëndetësor të bjerë në kolaps, por apeloi që qytetarët të respektojnë rregullat dhe protokollin e shëndetësisë.
“Që kur u bë strategjia e rihpajes ishte parashikuar që do ndodhte një numër i shtuar i rasteve. Dihet që hapja shoqërohet me daljen e njerëzve, me kontakte më të gjata midis njerëzve dhe është normale që në çdo strategji hapje të rriten numrat. Që të mos rriten numrat shumë, kjo strategji hapjeje duhej të shoqërohej me masa të kujdesshme se si duhej që të ruheshin njerëzit, dhe në fakt u bënë protokolle të kujdesshme për çdo aktivitet. Rendësi të veçantë të protokolleve merrte përdormi i maskave. Prandaj, nëse këto masa zbatohen ashtu siç janë zbatuar, është parashikuar që mos të ketë numra të frikshëm. Pra, mos të ketë numra që të detyrojnë sistemin shëndetësor të bjerë në kolaps. Deri tani pavarësisht se numrat janë në rritje të ndjeshëm, jemi në numra të pritshëm”, tha ajo.
Në Spitalin Infektiv në QSUT janë të shtruar 47 pacientë, ku 7 prej tyre janë në terapi intesive.
“Sot që po flasim numri i të shtruarve ka shkuar në 47. Ka të sëmurë më të rëndë se sa në momentin kur u hap lëvizja. Sot që po flasim 7 veta janë në shërbim intensiv, nga të cilët 1 i inutubuar, por janë të gjithë numra të pritshëm, pra nuk janë në ato numra që rrezikojnë kolapsin. Nëse ne do të vazhdojmë të mos respektojmë masat, këto gjëra mund të ndryshojnë. Ne jemi duke hetuar me kujdes rastet. Konkluzioni është se në përgjithësi nuk janë respektuar masat”, u shpreh ajo.
Më tej znj. Rakacolli tha se në të gjithë vendin janë konfirmuar 150 persona nga personeli shëndetësor të prekur me coronavirus.
“Që kemi një infeksion në QSUT e kemi, por jo vatër të madhe. QSUT ka 57 shërbime, ku ofrohet kujdesja për pacientët. Ky infeksion ka qenë problem, në mjekësinë interne dhe në hematologji. Shfaqja e infeksionit në spital është një gjë e pashmangshme, dhe ky është fenomen mbarëbotëror. Mjekët i kanë të gjitha mjetet. Janë rreth 150 veta të prekur. Nuk kemi pasur asnjë humbje jetë në stafin mjekësor. Mjekët shpenzojnë kohë në një ambient virusal dhe kjo është arsyeja pse preken”, shtoi ajo.
E pyetur nga gazetarja Esmeralda Mulaj për ecurinë e testeve serologjike, zv.ministrja e Shëndetësisë dhe këtë përgjigje: “Teste serologjike janë teste që po bëhen. Vlera e tyre është mjaft e debatushme, që nga lloji i testit dhe koha që merret. Është një eksperiencë që po provohet. Janë bërë rreth 5000 teste, ka mbaruar stafi i QSUT me pozitivitet 7 % dhe po shtrihet në punonjësit e shërbimit”, shtoi ajo.
Pavarësisht rasteve të shtuara znj. Rakacoilli u shpreh se nuk beson se do të ketë mbyllje të aktiviteteve. Ajo theksoi se në vijim mund të ketë shtim rastesh me COVID-19, por e gjithë kjo varet tek sjellja e qytetarëve.
“Me thënë të drejtën, me ato që vëmë re në jetën e përditshme, duke parë këtë lloj qasje të njerëzve që kujtojnë se virusi nuk është dhe nuk i përdorin mjetet që i përdorën në fillim, mund që të ketë shtim numrash, por nuk e besoj që të ketë tej numrave të parashikuar. Nuk e besoj. Me këto numra nuk e besoj. Situata është e kontrolluar dhe sistemi shëndetësor është në këmbë”, shtoi Rakacolli.
