Skuadra e Juventusit arriti të kualifikohej në finalen e Kupës së Italisë, ku pas dy ndeshjeve kundër Milanit, vendimtare rezultoi goli në fushën kundërshtare në ndeshjen e parë në “San Siro”.
Duke folur për barazimin 0-0 në ndeshjen e mbrëmshme, Sarri, deklaroi se në 30 minutat e para ishte i surprizuar nga skuadra e tij por me kalimin e minutave përqendrimi i bardhezinjve ra.
“Pas tre muajsh, rikthimi në pankinë dhe të shikosh skuadrën në fushë ishte një ndjenjë e mirë, edhe pse publiku të mungonte. Po dominonim ndeshjen dhe lëviznim topin me shpejtësi, në gjysmë orën e parë të lojës skuadra ka bërë mjaft mirë. Por pastaj ulëm ritmin dhe kemi luajtur me dy prekje. Diçka u thye disa muaj më parë. Janë lojtarë të cilët kanë qëndruar 70 ditë të ulur në divan, t’i kthesh në efiçencën e plotë fizike dhe intensitet nuk është e lehtë.”
Gjithashtu tekniku italian, tregoi se çfarë mund të kishte bërë më mirë në këtë ndeshje për sa i përket menaxhimit të pesë zëvendësimeve.
“Bëra një budallallëk. U përfshiva te entuziazmi që kemi pesë zëvendësime dhe bëra tre njëherazi, çka ishte një rrezik i madh. Në atë moment humbëm diçka në lojën tonë. Ndoshta në të ardhmen duhet t’i shpërndaj zëvendësimet.”
