Sapo kanë përfunduar pesë ndeshje të vlefshme për javën e 31-të të Bundesligës.
Borussia e Dortmund ka arritur një fitore me rezultatin 0-1 në transfertën e Dusseldorf-it falë një goli të yllit, Erling Haaland. Sulmuesi norvegjez u inkuadrua në fushën e lojës në minutën e 61-të pas disa problemeve fizike të shfaqura së fundmi.
Gjithsesi kur gjithçka u mendua e mbyllur, Haaland me një goditje mjaft të bukur me kokë realizoi duke shtangur vendasit.
Me këtë fitore verdhezinjtë konsolidojnë vendin e dytë ndërsa diferenca me Bayern Munich është në katër pikë por bavarezët do të luajnë ndeshjen e tyre në orën 18:30 kundër Borussia Monchegladbach në “Allianz Arena”.
Nga ana tjetër Werder Bremen ka arritur një fitore të thellë 1-5 kundër Paderborn-it duke siguruar 3 pikë mjaft të rëndësishme në luftën e tyre për të mbijetuar në elitën e futbollit gjerman. Për miqtë shënuan Klaassen dy herë në minutat 20’ dhe 39-të, dhe Osako, Eggstein dhe Fullkrug përkatësisht në minutat 34’, 60’ dhe 92’.
Për tu përmendur është se në këtë sfidë sulmuesi kosovar, Milot Rashica, humbi një 11-metërsh ndërsa rezultati ishte 0-0 në minutën e 18-të.
Në sfidat e tjera Koln u mund në shtëpi nga Union Berlin 1-2, Eintracht Frankfurt triumfoi në transfertë 1-4 kundër Herthës së Berlin-it, ndërsa Wolfsburg-u ndau një pikë me Freiburgun në barazimin 2-2.
