Ka shkuar në tre numri i të arrestuarëve në lidhje me operacionin e zbulimit të laboratorit të drogës të zbuluar në 1 maj të këtij viti në familjen Kapaj në Mbrostar Ura, Fier.
Pas hekurave sot ka përfunduar 53-vjeçari Aleksandër Kapaj, pronari që kishte përshtatur banesën si laborator për të kultivuar drogë.
Ndërsa më 1 maj u arrestuan bashkëshortja e tij Qamile Kapaj, 48 vjeçe dhe i biri Angelo Kapaj 22 vjeç. Vijon të jetë ende në kërkim bashkëpunëtori i tyre shtetasi F.B., 33 vjeç, banues në Kosovë.
Më 1 maj 2020, uniformat blu gjatë kontrollit të banesës, gjetën dhe sekuestruan në cilësinë e provës materiale 312 fidanë të dyshuar Kanabis, të kultivuara, pajisjet të cilat kanë shërbyer për kultivimin e bimëve narkotike si dhe një pajisje presimi, gërshërë etj. Nga këqyrja në ambientet e jashtme të rrjetit elektrik, u konstatua dhe një lidhje e paligjshme e energjisë elektrike, e cila shërbente për furnizimin e paisjeve, që ndihmonin në kultivimin dhe rritjen e bimëve narkotike.
Në operacionin në fjalë u proceduan penalisht dhe tre elektriçistët: G.M., E.M. dhe B.Q., banues në Fier.
Materialet i kaluan Prokurorisë pranë Gjykatës së Shkallës së Parë Fier, për veprime të mëtejshme procedurale.
