Pas Elbasanit ku një 73-vjeçare ka rezultuar e prekur nga Covid-19, dy raste të tjera, një në Gjirokastër dhe një në Vlorë, janë zbuluar në 24 orët e fundit.
Në Gjirokastër bëhet fjalë për një pacient, i cili është kuruar në Tiranë për hepatitin C dhe dyshohet se është infektuar me Covid-19 në spital. Gjirokastra nuk ka pasur asnjë rast të deklaruar zyrtarisht me Covid-19 që prej shfaqjes së pacientit të parë në Shqipëri.
Ndërsa në Vlorë i infektuar është një burrë, i cili punonte si bojaxhi. Prej javësh Vlora nuk regjistronte raste me Covid-19, ndërsa ishte ndër qytetet e para që u përfshi në zonën e gjelbër, ndërkohë që vendi ishte nën masat e karantinës.
Pacienti është paraqitur në poliklinikën Qendrore në Vlorë dhe nga simptomat është referuar të kryejë tamponin, nga i cili rezultoi pozitiv. I infektuari është dërguar në Tiranë.
Dyshohet se i prekuri ka pasur kontakt me një person nga Tiranë gjatë kohës që ka punuar në Himarë.
Ndërkohë raportohet edhe për zbulimin e 6 rasteve të reja me Covid-19 në Krujë.
