Deputeti Adriatik Alimadhi është shprehur të mërkurën se Qeveria shqiptare nuk e ka të vështirë të sigurojë votat në Kuvend për të miratuar ndryshimet për reformën zgjedhore të nënshkruar mes mazhorancës, opozitës parlamentare dhe asaj jashtë parlamentare me datë 5 qershor.
I ftuar në emisionin “Në Fokus”, në televizionin TVT me gazetarin Nertil Agalliu, Alimadhi theksoi se opozita parlamentare është përdorur tashmë nga mazhoranca dhe për më tepër kjo e fundit e ka realizuar qëllimin e saj.
Sipas tij, deputetët e rinj, janë të gatshëm të bëjnë çdo gjë për një mandat tjetër deputeti.
Ai mendon se mazharoanca ka përdorur disa element brenda opozitës parlamentare, duke u dhënë disa vende dhe mbi të gjitha duke u mbushur mendjen se kush e di se çfarë kapen.
“Pra, po ta shohësh mazhoranca e realizoi qëllimin e saj duke votuar ligje pafund të cilat mund t’i shërbejnë në një të ardhme dhe askush nga ata, tek-tuk ndonjë mund t’i ketë lexuar, dhe që i kanë bërë dëm shoqërisë shqiptare nëpërmjet këtyre ligjeve”, tha ai.
Alimadhi theksoi se ato ligje që janë miratuar me ato vota të opozitës parlamentare, nuk janë të dobishme për shoqërinë shqiptare, pasi ka pasur fatin të jetë anëtar i komisionit të ligjeve dhe pjesën më të madhe të tyre i ka lexuar dhe nuk është se kanë qenë të dobishme për shoqërinë shqiptare.
