Çudirat në Shqipëri nuk kanë të mbaruar. Rilindasit çdo gjë e shohin si mënyrë fitimi, aq sa kanë filluar bëjnë tender edhe për dreka familjare.
Pak ditë më parë Bashkia e Skraparit e shpalli ‘Qytetar Nderi’ mjekun Pëllumb Pipero për shkak të kontributit të tij në përballjen me Covid 19.
Për këtë arsye Bashkia ka vendosur që për nder të Piperos të organizojë edhe një drekë me 60 të ftuar.
Deri këtu gjithçka duket normale krejt normale, por pikërisht tek dreka fillojnë dhe çudirat. Bashkia ka ftuar subjeket bar restorant që të marrin pjesë në tender për ‘Drekën’ e Pëllumb Piperos.
‘Me rastin e dekorimit të mjekut epidemiolog si “Qytetar Nderi”, Bashkia e Skraparit ka vendosur që të shtrojë një drekë për nder të tij.
Për këtë arsye, Bashkia ka shpallur ftesën për ofertë për të gjithë të interesuarit. Tenderi do të zhvillohet më 11.06.2020, në orën 10:30. Dreka do të ketë 60 të ftuar, ndërsa menuja parashikon tre pjata kryesore, pije dhe fruta’ thuhet në njoftim.
Mjeku Pipero u shpall Qytetar Nderi i Skraparit në fund të muajit mars. Me propozim të kryetarit të Bashkisë Skrapar, Adriatik Mema, këshilli i bashkisë ia dha këtë titull më 28 mars.
Titulli u dha me motivacionin “Për veprimtari të shquar profesionale dhe akademike gjatë karrierës së tij në fushën e mjekësisë, veçanërisht në atë të sëmundjeve infektive, si dhe për kontributin e çmuar profesional dhe publik ne përballimin e situatës së pandemisë të shkaktuar nga Covid-19”.
