Koreja e Veriut ka thënë se do të ndërpresë të gjitha linjat e komunikimit ndër-koreane me Jugun, përfshirë edhe një linjë telefonike mes liderëve të dy vendeve.
Veriu tha që kjo ishte e para në një seri veprimesh, duke përshkruar Korenë e Jugut si “armikun”. Thirrjet ditore, mes dy vendeve, të cilat janë bërë në një zyrë ndërlidhëse të vendosur në qytetin kufitar të Koresë së Veriut, Kaesong, do të pushojnë nga e marta.
Koreja e Veriut “do të ndërpresë plotësisht dhe do të mbyllë linjën e ndërlidhjes midis autoriteteve të Veriut dhe Jugut, e cila është ruajtur përmes zyrës së përbashkët ndërlidhëse Veri-Jug … nga 12:00 në 9 qershor 2020”, thuhet në raportin e Agjencisë Qëndrore Koreane Veriore të Lajmeve (KCNA).
Kanalet e komunikimit ushtarak gjithashtu do të shkurtohen, tha Koreja e Veriut. Kur zyra ndërlidhëse u mbyll përkohësisht në janar për shkak të kufizimeve të Covid-19, kontakti midis dy shteteve u mbajt me telefon.
Të dy Koretë bënin dy telefonata në ditë nëpërmjet zyrave, në orën 09:00 dhe orën 17:00. Të hënën, Jugu tha se për herë të parë në 21 muaj, thirrja e saj në mëngjes kishte shkuar pa përgjigje, megjithëse kontakti ishte vendosur që pasdite.
“Ne kemi arritur në një përfundim se nuk ka nevojë të ulesh ballë për ballë me autoritetet e Koresë së Jugut dhe se nuk ka asnjë çështje për të diskutuar me ta, pasi ata vetëm sa kanë ngjallur shqetësim tek ne,” tha KNCA (Agjencia Qëndrore Koreane Veriore e Lajmeve).
Kim Yo-Jong, motra e udhëheqësit të Koresë së Veriut, kërcënoi javën e kaluar të mbyllte zyrën, përveç nëse Koreja e Jugut do të ndalonte grupet renegate për të dërguar fletëpalosje në Veri.
Ajo tha se fushata e fletëpalosjeve ishte një veprim armiqësor që shkelte marrëveshjet e paqes të bëra gjatë samitit të Panmunjom të vitit 2018 midis presidentit të Koresë së Jugut, Moon Jae-In dhe Kim Jong-Un.
***
Analizë nga Laura Bicker – Korrespondente e BBC nga Seuli
Është e mundur që kjo mbyllje nuk ka të bëjë vetëm me dërgimin e broshurave në kufi, por përkundrazi, të gjitha janë pjesë e një plani më të rëndë nga Peniani.
Koreja e Veriut mund të jetë duke krijuar një krizë, në mënyrë që të përdorë tensionin si levë në bisedimet e mëvonshme. Me pak fjalë, mund të jenë thjesht duke bërë të keqin, me vetëdije, për të marrë vëmendjen dhe për të kërkuar më shumë nga fqinji i tyre.
Ata e kanë luajtur këtë lojë të veçantë më parë në vitin 2013 për të tentuar të fitojnë më shumë lëshime nga Koreja e Jugut.
Gjithashtu është një shpërqëndrim i mirë brenda vendit. Kim Jong-Un nuk po arrin të sigurojë prosperitetin ekonomik që ai vazhdon duke e premtuar dhe thashethemet vijojnë të qarkullojnë që Covid-19 po prek disa pjesë të vendit. Bërja me një armik të përbashkët për kombin, ndihmon në mbledhjen e popullit të tij rreth një kauze.
Vlen të përmendet një nga dy nënkuptimet e kësaj politike. Motra e Kim, Kim Yo-Jong dha urdhër që të ndërpriten lidhjet me Seul-in. Kjo i jep asaj një platformë me një qendër vëmendjeje, e cila çon në nxitje të spekulimeve që ajo të shihet si një lidere e mundshme.
Por sa zhgënjyese duhet të jetë kjo për administratën e Moon-it, Presidentit të Koresë së Jugut. Dy vjet më parë në një valë optimizmi, vendi u ekzaltua ndërsa dy udhëheqësit u takuan dhe ranë dakord për të mbajtur linjat e telefonit të hapura. Tani të gjitha thirrjet drejt Veriut nuk po merren.
Dhe pyetja është, nëse ky është vetëm fillimi i planit të Penianit, çfarë vjen më pas?
Disidentet e Koresë së Veriut herë pas here dërgojnë balona që mbajnë fletëpalosje kritike për rajonin komunist në Veri, ndonjëherë me furnizime ushqimore dhe jo vetëm, për të nxitur koreanoveriorët për t’i marrë ato.
Korenoveriorët mund të marrin vetëm lajme nga media të kontrolluara nga shteti, dhe shumica nuk kanë qasje në internet.
Lidhjet midis Veriut dhe Jugut u dukën se u përmirësuan në vitin 2018, kur udhëheqësit e të dy vendeve u takuan tre herë. Takime të tilla të nivelit të lartë nuk kishin ndodhur brenda një dekade.
Por Peniani kryesisht ndërpreu kontaktin me Seulin pas mosmbajtes së një samiti midis Kim dhe presidentit amerikan Donald Trump në Hanoi vitin e kaluar që la bisedimet bërthamore në ngërç.
Të dy Koretë mbeten teknikisht në luftë sepse lufta Koreane e viteve 1950-1953 përfundoi me një armëpushim dhe jo me një traktat paqeje. /BBC/
/Marrë nga Mapo.al/
