Ditën e sotme Vllaznia ka emëruar si trajner të skuadrës Hysen Dedjan. Tekniku shkodran ka zëvendësuar në këtë mënyrë maqedonasin Mirsad Jonuz që u largua nga klubi pak ditë më parë.
Dedja mbërriti në Shkodër paraditen e sotme dhe pas një takimi me administratorin e klubit të Vllaznisë Suad Lici e kryetaren e bashkisë së Shkodrës, Voltana Ademi, doli në një konferencë për shtyp, për të treguar ndjesitë e para të këtij rikthimi për herë të katërt si trajner i kuqebluve.
Rikthimi te Vllaznia- Të jem i sinqertë që kur kam marrë telefonatë nga administratori Suad Lici, kam pasur një emocion shumë të madh. Të vish në Shkodër është një përgjegjësi e madhe. Sa u futa sot në Shkodër, gjithçka e lidhja me futbollin, me kujtimet e mija si futbollit. Gjithçka e lidhja me atë stadiumin.
Kontrata e firmosur- Fillimisht dua të falënderoj kryetaren dhe Suadin për besimin. Kontrata ime është këto 8 javë bashkë me Kupën. Duke e ndjekur skuadrën nga larg, mendoj se është një skuadër që ka brumë. Nuk i di problemet për largimin e trajnerit Jonuz. Mendoj se kur të bisedoj me skuadrën, do t’ia bëj të qartë se objektivat do të jenë madhore, siç i ka pasur klubi në fillim të sezonit.
Objektivat e skuadrës- Të rreshtohemi në mesin e tabelës, pse jo në Kupat e Europës. Kupa e Shqipërisë është një objektiv, pasi përfaqëson edhe një rrugë për të shkuar në Europë.
