Ardian Çapja është plagosur me armë zjarri sot në Krastë të Elbasanit. Dyshohet se ndaj 55-vjeçarit është kryer atentati i radhës në një rrugicë pranë banesës. Arma dyshohet të ketë qenë një snajper.
Pas atentatit, autorët kanë braktisur dhe djegur makinën në zonën e njohur si Fushë Mbret. Brenda në makinë ka pasur fishekë, të cilët kanë shpërthyer nga djegia duke plagosur njërin prej zjarrfikësve që po shuante flakët.
Rreth orës 09:37, në urgjencën e spitalit Elbasan, është paraqitur për ndihmë mjeksore 55 vjeçari Ardian Çapja, një emër i njohur për policinë, banues ne lagjen “Emin Matraxhiu”. 55 vjeçari u transportua më pas në spitalin e Traumës në Tiranë për mjekim më të specializuar.
Ai është arrestuar më parë në flagrancë për veprat penale ‘vrasje e punonjësve të policisë, e mbetur në tentativë” dhe “armëmbajtja pa leje”.
Ai dyshohet si organizator i një sërë vrasjesh të ndodhura në qytetin e Elbasanit për motive hakmarrjeje.
Dyshohet se Çapja, së bashku me të afërm të tij ka kryer disa vrasje me pagesë, në periudhën 2009-2016.
