Operacioni Forca e Ligjit i ka dërguar ditën e sotme formularët e vetëdeklarimit të pasurisë, katër shtetasve me banim në Tiranë dhe një me banim në Kavajë, në kuadër të operacionit anti-KÇK, të nisur prej fillimit të shkurtit.
Sipas burimeve zyrtare, OFL u ka dërguar kërkesat për vetëdeklarim të pasurisë, shtetasve:
– A. H., banues në Tiranë, i dënuar për veprën penale “Vjedhja me dhunë”;
– K. Q., banues në Tiranë, i dënuar për veprën penale “Vjedhja me dhunë”;
– E. M., banues në Tiranë, i dënuar për veprën penale “Vjedhja me dhunë”;
– S. K., banues në Kavajë, i dënuar për veprën penale “Prodhimi dhe shitja e lëndëve narkotike”;
– D. M., banues në Tiranë, i dënuar për veprën penale “Vjedhja me dhunë”, e kryer në bashkëpunim;
Burime bëjnë me dije se këta shtetas janë Arsen Hysenaj, Klajdi Qirjo, Elvis Muça, Sejbi Kazazi, dhe Daniel Meta.
“Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së, të cilat do t’i dërgohen SPAK-ut, për veprime të mëtejshme”, thuhet në njoftimin e OFL-së.
