Chelsea ka rinovuar kontratën me talentin e skuadrës, Tino Anjorin.
18-vjeçari debutoi këtë vit me skuadrën e të rinjve në ndeshjen e Carabao Cup kundër Grimsby Toën. Sulmuesi është golashënuesi më i mirë i skuadrës së dytë të Chelseas dhe kjo ka bindur trajnerin Frank Lampard t’i ofrojë kontratë 5-vjeçare.
“Është një ndjenjë e shkëlqyeshme”, tha ai pasi nënshkroi marrëveshjen e re.
‘’Unë kam qenë në klub që kur kam qenë 6 vjeç. Nuk kisha asnjë hezitim, por nënshkrova menjëherë kontratën e re, sepse të luaja për klubin për të cilin gjithmonë ëndërroja është vërtet e veçantë për mua”, tha Anjorin.
Chelsea vazhdon në këtë mënyrë strategjinë drejt afirmimit të talenteve të reja, ku veçanërisht këtë sezon disa lojtarë të akademisë së Chelsea-t, si Callum Hudson-Odoi, Tammy Abraham, Mason Mount apo Fikayo Tomori kanë shkëlqyer për londinezët.
Kujtojmë që Chelsea, i rinovoi kontratën edhe sulmuesit shqiptar Armando Broja, ndërsa ka bërë edhe debutimin me skuadrën e parë, në sfidën kundër Everton-it më 8 mars.
