Deputeti Ralf Gjoni e ka quajtur pazar të turpshëm marrrëveshjen për Reformën Zgjedhore dhe paralajmëron se ajo nuk do votohet në Kuvend. Përmes një postimi në rrjetet sociale, Gjoni shkruan se vota e tij do jetë kundër pasi nuk adresohet në atë marrëveshje as vota e Diasporës dhe as sistemi zgjedhor. Sipas tij, pa lista të hapura asnjë kod zgjedhor nuk miratohet nga opozita e re në parlament.
“Që të kuptohemi qartë, duhen disa pika mbi i:
Do bëja gjithçka për integrimin evropian të Shqipërisë, por kurrë nuk do punoja kundër interesave të popullit tim. Kurrë!
Pa lirinë e votës, nuk ka demokraci. Pa demokraci, nuk ka asnjë shans të ketë drejtësi!
Teksti i shitur si çelësi i ‘integrimit’ nuk ka asnjë lidhje me reformën zgjedhore që prisnin shqiptarët dhe me asnjë ‘standart evropian’ në anglisht, italisht apo frengjisht qoftë.
Ajo është një marrëveshje e turpshme pazari që rehabiliton Luli Bashën, siguron mandatin e tretë të Edi Ramës dhe kthen kasetën prapa, tek fillimi i këngës”, shkruan Gjoni.
Sipas tij, ajo marrëveshje nuk ofron shpresë, por shton dëshpërimin e shqiptarëve, të cilët me të drejtë duan të largohen nga vendi.
“Marrëveshja Basha-Rama nuk siguron votën e lirë e të barabartë, por e lë sistemin pre të manipulimeve zgjedhore”, shprehet ai.
Gjoni paralajmëron se nëse kjo marrëveshje kalon në Parlament, vendi ynë do bëhet gjithnjë e më i thyeshëm ndaj interesave malinje të aktorëve lindorë, islamikë e anti-perëndimorë, sepse ata që kanë tru do largohen prej korrupsionit gjithnjë e më masivisht.
