Aleksandar Katai, një mesfushor 29-vjeçar nga Serbia, u shkarkua nga skuadra e LA Galaxy, pasi gruaja e tij, Tea Katai, postoi në mediat sociale disa foto të shoqëruara me përmbajtje raciste.
Në një nga postimet në Instagram të cilat më pas janë fshirë nga vetë ajo, partnerja e futbollistit iu referua protestuesve në nder të George Floyd si “bagëti të neveritshme”. Në një postim tjetër ajo bënte thirrje që protestuesit e dhunshëm të vriteshin.
Ndërkohë klubi amerikan ka reaguar në rrjetet sociale duke bërë të ditur se veprime të tilla nuk mund të tolerohen dhe për pasojë futbollistit serb i është ndërprerë kontrata.
Ndaj kësaj situate ka reaguar vetë Katai, i cili ka kërkuar falje për veprimet e bashkëshortes dhe thekson që ai nuk ndan aspak të njëjtat mendime, ndërkohë ka pranuar vendimin e La Galaxy.
