Gjykata e Tiranës ka caktuar masën e sigurisë “Arrest me burg” për 37-vjeçarin Roland Kryemadhin, të arrestuar para tre ditësh në Kamëz pasi kërcënoi policinë me armë zjarri.
Mësohet se gjatë seancës së sotme ai nuk ka pranuar që të kishte armë gjatë momentit të mësymjes së policisë në banesën e tij. Gjithashtu bëhet me dije se nuk ka pranuar as avokat mbrojtës, por është mbrojtuar nga avokati Ilir Murati.
Kryemadhi nuk lejonte tre vajzat e tij të shkonin në shkollë, me argumentin se fëmijët e tij i shkollonte Allahu, ndërsa për arrestimin e tij u angazhuan edhe forcat RENEA, të cilat i rrethuan banesën.
Në fund të seancës gjyqësore, avokati i 37-vjeçarit tha se kërkon zbutjen të masës së sigurisë për klientin e tij, duke e cilësuar atë jo të rrezikshëm për shoqërinë.
Ngjarja
Paraditen e 3 qershorit, shërbimet e policisë shkuan në banesën e tij, për ta shoqëruar në Gjykatë, në zbatim të kërkesës së saj, për shoqërim të detyrueshëm të tij.
Në momentin që uniformat blu kanë hyrë në banesë ky shtetas ka nxjerrë një armë zjarri pistoletë dhe ka kanosur punonjësit e Policisë për vrasje në rast se do afroheshin dhe më pas është mbyllur në banesë.
Menjëherë në ndihmë të Policisë lokale kanë shkuar forcat e DVP Tiranë, FNSH dhe RENEA dhe është bërë rrethimi i banesës, vendosja e perimetrit të sigurisë, evakuimi i banorëve dhe ndalimi i qarkullimit në perimetrin e sigurisë.
Pas negociatave të bëra nga Forcat Speciale RENEA me autorin, për t’u dorëzuar, ku i fundit, pas gjysmë ore, është vetëdorëzuar, në pamundësi për t’u larguar nga banesa.
