Kategoria Superiore luan sot javën e 28-të, ku të gjitha ndeshjet do të zhvillohen në orën 17:00.
Tirana kryesuese ka një ndeshje të lehtë në letër, teksa do të përballen në transfertë kundër Luftëtarit. Klubi gjirokastrit mban vendin parafundit në klasifikimin e përgjithshëm dhe bardheblutë do të përpiqen të dalin me tre pikë nga kjo ndeshje, një sukses që do t’i afronte gjithnjë e më shumë me titullin kampion.
Por vëmendja maksimale do të jetë në kryeqytet, ku do të luhet edhe kryendeshja e javës, Partizani-Kukësi, e cila do të startojë gjithashtu në orën 17:00 në stadiumin “Selman Stërmasi”. Kampionët në fuqi po kalojnë një moment mjaft të vështirë dhe jo vetëm që kanë komplikuar objektivin për një vend në Kupat e Europës, por tani rrezikojnë të zbresin në vendin e tetë, ku për mbijetesën do të duhet të luajnë sfidë Play Off-i.
Ndeshja ndaj Kukësit shihet si vendimtare edhe për fatet e trajnerit italian Sormani, i cili rrezikon shkarkimin nga rezultatet e dobëta të skuadrës.
Në ndeshjet e tjera, Bylisi pret në shtëpi Teutën, Skënderbeu udhëton në Vlorë për tu përballur me Flamurtarin, ndërsa një sfidë interesante është ajo mes Laçit dhe Vllaznisë.
