Legjenda e boksit, Floyd Mayweather do të paguajë shpenzimet e funeralit të George Floyd, i cili u vra në datë 25 maj nga policia e Minneapolisit në SHBA.
Stafi i boksierit, bëri të ditur se amerikani kishte vizituar familjen e George për të ofruar mbështetje, duke shtuar se 43-vjeçari do të angazhohet të paguajë shpenzimet e varrimit të të ndjerit.
Leonard Ellerbe, Drejtori i Përgjithshëm i “Mayweather Promotions” shtoi se familja e kishte pranuar ofertën. Avokati i familjes së George, tha të hënën se një funeral do të mbahet më 9 qershor në Houston.
Para kësaj, familja do të zhvillojë një shërbim përkujtimor në Minneapolis të enjten dhe një shërbim përkujtimor të shtunën në Karolinën e Veriut, vendi i lindjes së George Floyd.
Një autopsi zyrtare e lëshuar të hënën konfirmoi se Floyd vdiq nga mungesa e oksigjenit për shkak të presionit të vazhdueshëm të ushtruar në qafën e tij nga polici Derek Chauvin.
Chauvin është akuzuar për vrasje të shkallës së tretë dhe një akuzë për vrasje nga pakujdesia në vdekjen e Floyd ndërkohë që kërkohet edhe arrestimi i tre policëve të tjerë të cilët nuk bënë asgjë për të parandaluar ngjarjen e rëndë.
