Dy persona janë arrestuar në lidhje me vdekjen e 17-vjeçarit që u godit aksidentalisht nga një skrep në një kantier ndërtimi ditën e djeshme. Ata janë Ersel Mullai, 32 vjeç, me detyrë drejtues teknik dhe Bujar Xhakeri, 29 vjeç, me detyrë manovrator i mjetit gërmues.
Ata u arrestuan gjatë punimeve për hapjen e një shesh parkimi në lagjen “Ujë i Ftohtë”, ku goditën me mjetin gërmues 17-vjeçarin duke e lënë të vdekur në vend.
Gjithashtu gjatë fundjavës janë arrestuar edhe 4 persona të tjerë, ku R. K., 37 vjeç, banues në fshatin Trevllazër, Vlorë u kap në flagrancë pasi në pronën e tij u gjetën të mbjella disa fidanë të dyshuara si cannabis sativa.
S. S., 67 vjeç, banues në fshatin Çeprat, Vlorë është arrestuar për veprën penale “Ngacmimi seksual”, pasi nga hetimet e kryera, dyshohet se një ditë më parë ka ngacmuar seksualisht një shtetase të mitur.
F. M., 28 vjeç, banues në fshatin Bishan, Vlorë u kap në lagjen “11 Janari” Vlorë, duke drejtuar automjetin në gjendje të dehur.
A. K., 18 vjeç, banues në Sarandë, u kap në lagjen nr.1 Sarandë, pasi u konstatua duke drejtuar automjetin pa leje drejtimi përkatës.
Sipas policisë, për të 6-të të arrestuarit materialet iu referuan Prokurorisë për veprime të mëtejshme.
