Ka nisur që prej orës 19.00 me dyer të mbyllura mbledhja e Këshillit Politik që po diskuton ndryshimet në ligjin e zgjedhjeve.
Burime nga brenda takimit thonë se në tryezë janë propozimet e opozitës për krijimin e një qeverie kujdestare para zgjedhjeve dhe angazhimin e Gjykatës Kushtetuese në procesin e animimit të rezultatit ose procesit. Të njëjtat burime thanë se opozita ka depozituar një natë më parë të gjitha propozimet e saj që kanë të bëjnë me garantimin e votës.
“Gjëja pozitive është se në tryezë nuk ka çështje të reja. Opozita i ka dorëzuar që mbrëmë propozimet për garancitë e votës në zgjedhje, duke e çuar deri në fund pjesën e angazhimit të saj me reformën zgjedhore. Pjesë e këtyre propozimeve janë edhe qeveria kujdestare për zgjedhjet dhe roli i Gjykatës Kushtetuese. Diskutimi i tyre ende nuk ka nisur, por është e rëndësishme që të gjitha çështjet janë mbi tavolinën e bisedimeve”, – thanë të njëjtat burime. /Lapsi.al
