Dortmundi ka shkatërruar Paderborn-in me rezultatin 1-6. Verdhezinjtë u treguan të pamëshirshëm ndaj skuadrës që mban vendin e fundit në tabelën e renditjes, duke mos e vënë në diskutim për asnjë moment ndeshjen.
Njeriu i ndeshjes ishte padyshim Jadon Sancho, i cili realizoi një triplet personale. Rezultatin e ndeshjes e zhbllokoi Thorgan Hazard në minutën e 54-t aty ku nuk e kishte të vështirë të shënonte, pasi topi i mbeti në zonën e rreptësisë dhe e shtyu drejt rrjetës.
Tre minuta më vonë Sancho dyfishoi shifrat dhe nxori fanellën ku shfaqet një shkrim kundër racizmit. Aty shkruhet: “Drejtësi për Greorge Floyd”.
Paderborn reagoi duke ngushtuar rezultatin me penallti në minutën e 71-të me anë të Hunemeier, por vetëm 2 minuta më vonë ishte sërish Sancho që shënoi duke rikthyer qetësinë te verdhezinjtë, duke i çuar shifrat në 3-1.
Më pas, Hakimi në minutën e 85-të dhe Schmelzer në të 89’ thellojnë diferencën e golave deri në 5-1.Për të vulosur rezultatin final 6-1 mendon Sancho, i cili në këtë takim realizon tripletë.
