UEFA tani ka nisur llogaritë për të përpiluar kalendarin e ndeshjeve të mbetura të Champions dhe Europa League që me siguri do të luhen gjatë muajit gusht pasi kampionatet e ligave europiane të kenë përfunduar.
Një lajm i bujshëm vjen nga “New York Times”, gazetë e cila bën të ditur se Stambolli ka refuzuar të presë finalen e Ligës së Kampionëve, që paraprakisht është menduar të zhvillohet më 29 gusht, pasi për qytetin turk nuk përbën interes një ndeshje pa praninë e tifozëve.
Ky lajm besohet të jetë i vërtetë pasi asnjë zyrtar i UEFA-s nuk e përgënjeshtrojnë, madje shtojnë se qeveria europiane e futbollit po studion një tjetër alternativë për finalen.
“Kalendari dhe formati janë ende të hapur dhe gjithçka do të vendoset në mbledhjen e Ekzekutivit më 17 qershor”, mësohet të ketë deklaruar një zyrtar i UEFA-s, për FrancePress, ndërsa ka pranuar gjithashtu edhe refuzimin e Stambollit për të pritur finalen pa tifozë.
Në këto kushte, UEFA pritet të marrë në konsideratë zhvillimin e ndeshjes me tifozë në Stamboll, gjithnjë nëse autoritetet turke do të lejojnë diçka të tillë, ose të gjejë një tjetër stadium për të pritur finalen dhe kryeqendrës turke t’ia kompensojë në një tjetër edicion.
