Në Parlamentin Evropian ka nisur seanca ku presidentja e Komisionit Evropian, Ursula Von der Leyen do të prezantojë buxhetin e ardhshëm 7-vjeçar të Bashkimit Evropian, i cili do të kalojë shifrën e 1 trilion eurove si dhe fondin e rimëkëmbjes nga COVID-19 që parashikohet të jetë rreth 750 miliardë euro.
Gjermania dhe Franca propozuan javën e kaluar që të rrisin borxhin e përbashkët evropian në përpjekje për të mbështetur rikuperimin ekonomik nga kriza e coronavirusit.
Njoftimi ishte jashtëzakonisht domethënës pasi Gjermania ka qenë një kundërshtare e rreptë e idesë së rritjes së borxhit evropian dhe ndryshimi i qëndrimit të saj sugjeron se BE mund të jetë duke lëvizur më pranë një unioni fiskal, një faktor ky i rëndësishëm stabiliteti.
Në një lidhje të drejtpërdrejtë nga Brukseli, korrespondenti i Euronews Albania, Ernest Bunguri bëri me dije se në buxhetin e propozuar prej 1,1 trilionë eurosh përfshihen edhe fondet për Ballkanin perëndimor për zgjerimin.
“Nesër komisionerët do të tregojnë me hollësi si mendohet të ndahen këto fonde. Ndërkohë, më vonë gjatë ditës pritet që Johanes Hahn, i cili është përgjegjës për buxhetin të japë një konferencë për mediat, ku do të përpiqemi të mësojmë më shumë për pjesën e Ballkanit.
Por lajmi i mirë është edhe propozimi i komisionit për një fond prej 750 mld eurosh për atë që tashmë quhet instrumenti i rimëkëmbjes, duke tejkaluar kështu edhe planin franko-gjerman që bënte fjalë për 500 mld euro. Pritet që Von der Leyen të njoftojë se 500 mld do të jenë në formë grantesh për të ndihmuar vendet për të ringritur ekonomitë e tyre dhe 250 mld në formë huash”, tha korrespondenti i Euronews Albania.
Për sa i përket ndihmës që përfiton Shqipëria, ashtu si edhe vendet e rajonit, veç atyre shifrave që i njohim dhe ishin një përgjigje emergjente për përballimin e situatës gjatë pandemisë, që ishin rreth 3,3 mld euro, pritet edhe paketa ekonomike dhe ajo e investimeve që KE do të paraqesë në shtator.
“Për pjesën e ndihmës caktuar vendit tonë, bëhet fjalë pak a shumë për të njëjtin fond që ka përfituar gjatë 7 viteve të shkuara, por pritet edhe për një rritje të këtyre fondeve për të përballuar pasojat e krizë që la pas COVID-19”, tha korrespondenti i Euronews Albania në Bruksel./euronews.al
DENONCO