Ditën e djeshme u raportua për një dëmtim serioz të Zlatan Ibrahimovic që vendosi në ankth shumë tifozë të lojtarit. Sulmuesi 38-vjeçar braktisi stërvitjen dhe kishte dyshime për një dëmtim të rëndë në tendinën e Akilit, çka praktikisht do mbyllte sezonin dhe karrierën.
Por duket se suedezi ia ka hedhur paq, ndërsa dëmtimi i tij nuk është serioz. Lajmin e ka konfirmuar Milani, që pas ekzaminimvet mjekësore dhe rezultateve në grafi përjashtohet dëmtimi i rëndë.
“AC Milan raporton se Zlatan Ibrahimovic, në stërvitjen e djeshme pësoi një dëmtim të muskulit solis të pulpës së këmbës së djathtë. Tendina e Akilit është krejtësisht e paprekur. Një kontroll me instrumente do të bëhet brenda dhjetë ditësh”.
Praktikisht, ky lloj dëmtimi kërkon një kohë rikuperimi rreth një muaj, por mund të mjaftojnë edhe 3 javë nëse trupi do të reagojë mirë dhe fiziku i Zlatan ia lejon këtë gjë.
