Familjarët e 51-vjeçarit Bilbil Zekaj, hedhin dyshime mbi vetëvarjen e tij me çarçaf në qelinë e burgut.
Për mediat ata shprehen se Bilbil Zekaj nuk kishte arsye që të ndërmerrte një akt të tillë.
”Nuk pata asnjë pikë dyshimi për të, flsinim çdo ditë në telefon. Kërkonte fishat e insulinave. Siç fliste çdo ditë, pyeste për fëmijët. Prisnim datën 26 që kishte gjyqin. Nuk kishte asnjë ditë që mos më fliste. Mos u mërzit më thoshte se do vij unë, mbaji fëmijët pranë. Unë dua të drejtën, dua provat. Më thanë njerëzit e mi se unë nuk i kisha parë lajmet në televizor. Nuk më kishte lënë pikë dyshimi”, tha bashkëshortja e tij.
Në shtator të 2019, 51-vjeçari është arrestuar pasi në banesë iu gjenden 1,2 kg lëndë narkotike. Mësohet se këtë sasi ai e gjeti teksa po kulloste në kodrat e fshatit. Ai kishte 8 muaj që ndodhej në paraburgimin e burgut të sigurisë së lartë në Fier dhe ditën e nesërme kishte seancën e rradhës gjyqësore.
