Marco Zappa, këngëtar i njohur nga Zvicra që këndon në gjuhën italiane, i ka kushtuar një këngë shembjes së Teatrit Kombëtar, që ka provokuar protesta të ashpra të udhëhequra nga Aleanca për Mbrojtjen e Teatrit.
Klipi i këngës ka edhe pamje nga shkatërrimi i godinës së Teatrit, ndërsa shfaqet aksioni i policisë për të shembur godinën e TK-së.
“Nuk e bëri tërmeti, e bëri pushteti”, është një nga parrulat që shoqëron videon, ndërsa Zappa shprehet se edhe “unë jam shqiptar”.
“Shuat një qiri që ndriconte qytetin. Përse?”, thuhet ndër të tjera në teksin e muzikës. Më tej, në tekst nënvizohet edhe se “dhuna e një pushteti të kujton të kaluarën”.
Teatri Kombëtar u shemb më 17 maj, në orët e natës, ndërsa Kryeministri Edi Rama kishte plot 21 vjet që priste shembjen e godinës. Pasi dështoi si ministër i Kulturës dhe Kryebashkiak i Tiranës, për të shembur godinën, Rama e arriti qëllimin 1 javë më parë, duke përdorur Kryebashkiakun Erion Veliaj dhe anëtarët e Rilindjes në Këshillin Bashkiak.
Kundër shembjes së Teatrit ka reaguar komuniteti i artistëve dhe aktorëve, Presidenti Meta, opozita, Europa Nostra, si dhe komuniteti ndërkombëtar.
