Gabriele Oriali ka dhënë dorëheqjen nga pozicioni i menaxherit të skuadrës kombëtare italiane. Ky vendim është marrë pasi 67 vjeçari do të përqendrohet vetëm tek skuadra e Interit ku që prej verës së kaluar mban të njëjtin post si në kombëtare.
Oriali u rikthye te zikaltrit verën e kaluar me kërkesë të Antonio Contes dhe Giuseppe Marottës, ndërsa vendosi me marrëveshje që të vijonte të mbante postin e menaxherit të kombëtares italiane deri në fund të Kampionatit Europian 2020.
Por duke qenë se Euro 2020 u spostua për shkak të pandemisë globale të coronavirusit, Oriali vendosi të japë dorëheqjen, duke i kursyer Federatës Italiane të Futbollit edhe dy paga, pasi ishte nën kontratë deri në fund të muajit korrik.
