Është arrestuar autori i plagosjes me armë të 29-vjeçarit Marjus Xhafa në orët e para të mëngjesit të sotëm në Kavajë.
Burime zyrtare bëjnë me dije se është vënë në pranga autori kryesort i plagosjes Viskon Hysi 27-vjeç. Ndërsa janë shpallur në kërkim dy bashkëpunëtorët e tij, shtetasit S. V., 40 vjeç dhe E. C., 35 vjeç.
Të dy këta shtetas u shpallën në kërkim, së bashku me automjetin që janë larguar dhe vijon puna intensive për kapjen e tyre, si dhe për gjetjen e sekuestrimin e automjetit në cilësinë e provës materiale.
Grupi hetimor ka sekuestruar në cilësinë e provës materiale automjetin që drejtohej nga shtetasi Viskon Hysi, brenda të cilit u gjetën një gëzhojë, një antiplumb, 4 aparate celular, si dhe një automjet tjetër në pronësi të 27-vjeçarit.
Materialet hetimore në lidhje me këtë ngjarje i kaluan Prokurorisë pranë Gjykatës së Shkallës së Parë Kavajë, për veprime të mëtejshme, për veprat penale “Vrasja me paramendim’’ e mbetur në tentativë, kryer në bashkëpunim dhe “Mbajtja pa leje dhe e armëve, armëve shpërthyese dhe municionit”.
Ngjarja ndodhi rreth orës 01:00 të mëngjesit, tek ish-fabrika e letrës, në Kavajë, ku pas një konflikti për motive të dobëta mbeti i plagosur me armë zjarri në këmbë, Marjus Xhaferi, i cili u dërgua në spitalin e Durrësit, jashtë rrezikut për jetën.
