Besimtarët myslimanë kanë falur sot namazin e Fitër Bajramit, në xhamitë e vendit, pas një muaji sakrificash e solidariteti.
Në dallim nga vitet e mëparshme, besimtarët në Tiranë nuk janë falur në sheshin “Skënderbej”, por në xhamitë e kryeqytetit, referuuar rregullave të Qeverisë kundër Covid-19.
Xhamitë të cilat u hapën pas presioneve drejtuar Qeverisë nga besimtarët, që duket se shpërfillën urdhërat e Kryeministrit, i cili riktheu masat izoluese dhe mbylli Tiranën në të gjitha aspektet.
Fiter Bajrami është festa, e cila bëhet pas mbarimit të muajit të Ramazanit. Emri Fitër Bajram vjen nga fakti se myslimanët para ditës së Bajramit shpërndajnë lëmoshë, solidarizohen me të varfrit, dhe kështu në këtë mënyrë festojnë së bashku këtë festë.
Zoti ligjësoi në fund të muajit të Ramazanit festën e Fiter Bajramit, gëzim për myslimanët, ashtu siç ligjësoi festën e Kurban Bajramit në ditën e dhjetë të muajit Dhul-Hixhxhe. Festa e Bajramit manifestohet duke falur namazin e Bajramit. Namazi i Bajramit është obligim i domosdoshëm për çdo mysliman. Muhammedi i ka kushtuar rëndësi të veçantë duke i urdhëruar myslimanët që të falin këtë namaz. Koha e namazit të Bajramit fillon me ngritjen e diellit nga horizonti sa një shtizë, derisa të arrijë në zenit.
