Ditën e djeshme u raportua se PSG-ja bëri një ofertë konkrete për Interin për të siguruar përfundimisht shërbimet e Mauro Icardit.
Klubi francez, ofroi 50 milionë euro dhe 10 milionë të tjera në formën e bonuseve. Nga këto negociata duket se ka lajme të reja pasi siç raportojnë mediat në Itali, zikaltërit kanë refuzuar ofertën e bërë nga klubi francez. Klubi nga Milano po mundohet të përfitojë shumën që është në klauzolën e marrëveshjes aktuale.
Inter ka kërkuar nga PSG 60 milion euro, plus të njëjta bonuse, por që varen nga klauzola të lehta dhe që i japin mundësinë zikaltërve të përfitojnë nga transferimi i tij plot 70 milion euro. Tani është në dorë të francezëve se çfarë do të bëjnë.
Periudha e huazimit të Icard-it te PSG-ja skadon gjatë verës dhe argjentinasi nuk do të rikthehet te Interi kjo edhe pasi italianët nuk mund të përballojnë pagën e tij. Të interesuar për sulmuesin janë edhe Napoli e Juventusi, por Interi nuk është i interesuar ta shesë brenda Italisë dhe një marrëveshje me PSG-në do të ishte idealja.
