“Nuk mund ta kemi integrim në BE pa reformë zgjedhore dhe pa reformë në drejtësi. Këto të dyja nuk janë diçka për të bërë Pazar”. Kjo ishte deklarata e ambasadores së SHBA në vendin tonë Yuri Kim më herët gjatë ditës, që iu kujtua Presidentit Ilir Meta, gjatë konferencës që mbajti ky i fundit, ku prezantoi platformën, që sipas tij, do ti shërbejë përshpejtimit të integrimit të vendit në Bashkimin Eurpian.
Meta u pyet nga gazetarë, nëse ishte ai personi që po bën pazare me reformën në drejtësi. Kreu i shtetit u shpreh: “Unë kam katër vite që them stop lojërat me Reformën në Drejtësi, prandaj them se ambasadorja ka të drejtë për atë që thotë”.
“Shqetësimi është i drejtë, pasi aktorët politikë kanë luajtur dhe Presidenti nuk është aktor politik, por kreu i shtetit. Kam kërkuar gjithmonë zbatimin e Reformës në Drejtësi. Tani që jemi në këtë situatë, përsëri presidenti është gati të ballafaqohen të gjithë, për të parë se kush ka bërë dhe kush po bën lojëra. Nuk po negocioj asgjë përveç këtyre 14 pikave. Këto i dinë të gjithë që në 8 prill, përfshirë ambasadoren e SHBA dhe ambasadorin britanik, që s’është më as në BE. E dinë të gjithë platformën e presidentit Meta, do të jetë kudo, që të shikojnë dhe vlerësojnë se çfarë ka kërkuar presidenti Ilir Meta”, shtoi ai.
Meta tha se do kërkojë hetim ndërkombëtar për Reformën në Drejtësi.
“Maskat kanë rënë”, deklaroi ai, ndërsa përgjegjës për kapjen sipas tij të reformës në drejtësi është kryeministri Edi Rama, të cilin e quajti “fabrika e thashethemeve”.
