Skenat e dhunës policore gjatë protestës së të Dielës në Tiranë pasi u shemb Teatri Kombëtar lanë një shije të hidhur. Pamjet e efektivëve të policisë që gjuanin me shqelma qytetarë të shtrirë përtokë kaluan kufijtë, duke u pasqyruar dhe në mediat ndërkombëtare. Pati po ashtu reagime që e dënuan.
“Frikësimi dhe përdorimi i dhunës ndaj protestuesve, shoqërisë civile, artistëve si dhe politikanëve të opozitës janë të papranushme”, u shpreh ish-kreu i Këshillit Europian, njëkohësisht President i Partive Popullore Europiane, Donald Tusk.
Kryeministri Edi Rama deklaroi një ditë më parë, se nuk pa dhunë. Sot, një nga ministrat më të rëndësishëm të kabinetit të tij qeveritar e përligji.
Nga foltorja e Kuvendit, Sandë Lleshaj tha se u lënduan 7 policë, por nuk kishte pasur asnjë informacion për protestues të lënduar.
“Më 17 maji pati konfrontime mes protestuesve dhe policisë. Kronikat regjistruan 7 policë që kanë përfunduar në spital të plagosur, me plagë të lehta, por të gjakosur. Nga kush. Nga ata që duan me plagë të nga ata që duan të na vendosin antikulturën dhe nuk kam të dhëna që pati të lënduar nga protestuesit. Pati të ndaluar, të shoqëruar në komisariat. Po pati sepse duhet të bëjmë të qartë”, deklaroi Ministri i Brendshëm.
