Deputetja Rudina Hajdari, bashkëkryetare në komisionin e reformës zgjedhore, gjatë një interviste në emisionin “Opinion” i ka bërë ftesë kryetarit të PD Lulzim Basha për bashkëpunim në ndryshimin e sistemit.
E pyetur për raportet që aktualisht ka me Partinë Demokratike, Hajdari u shpreh: “Unë kam raport me çdo njeri që do të ndryshojë sistemin zgjedhor. E dëgjova sot zotin Basha që tha jam pro listave të hapura. Dhe e ftoj të vijë në tryezë të luftojmë bashkarisht për ndryshimin e sistemit dhe listat e hapura, sepse i shërben demokracië. Dhe një forcë politike si PD, e djathtë, e para që ka vendosur demokracinë në këtë vend, duhet të jetë pro ndryshimit të sistemit. Dhe besoj që me kalimin e kohës do e kuptojnë. Kam qenë në atë këshill dhe në momentin që flitet për ndryshimin e sistemit, palët ulin sytë dhe nuk flasin fare. Bien dakord me njëri tjetrin”, u shpreh Hajdari.
Megjithatë më herët, teksa foli për përfshirjen e saj në politikë Hajdari tha: “Beteja ime për t’u futur në politikë ka qenë dëshirë, që kur isha 20 vjeç. Ishte çështje moshe dhe mendova se ishte momenti i duhur. Nuk e mendova kurrë që një kryetar partie ka këtë lloj imponimi ndaj deputetëve dhe i quan tradhtarë”.
