Aleanca për Mbrojtjen e Teatrin po zhvillon një protestë para SPAK, ku kërkuan hetim lidhur me shembjen e Teatrit Kombëtar.
Regjisori Edmond Budina pohoi se SPAK duhet të hetojë tentativën për tentativë vrasje nga policia, pasi brenda teatrit gjatë kohës që po niste shembja, kishte artistë. Akademiku Ervin Goci tha se ditën e shembjes atyre ju rrezikua jeta. “Na vunë ruspat mbi trup. Jemi në kushtet e azilantëve politikë, po na rrezikohet jeta”, u shpreh Goci, i cili shtoi se materialet e Teatrit Kombëtar po cohen për tu djegur në inceneratorë.
Aleanca u bëri apel dhe selive diplomatike në vendin tonë të reagojnë lidhur me çështjen. Paralajmëruan dhe përshkallëzim të protestave.
“Arrest me burg për Veliajn dhe Maznikun”
Një përfaqësuese ligjore e Aleancës për Teatrin konfirmoi se SPAK ka nisur hetimet lidhur me kallëzimin e Aleancës, ndërsa kërkoi arrestimin e Veliajt dhe Maznikun.
Ardiana Kalaja tha se duhet të vendosen nën sekuestro preventive trualli ku ka qenë Teatri Kombëtar, të pezullohen punimet deri në një vendim përfundimtar nga drejtësia për çështjen, dhe të vendoset masa e arrestit me burg për kryebashkiakun e Tiranës Erion Veliaj dhe nënkryetarin Ardian Mazniku, për akuzat shpërdorim detyre dhe korrupsion pasiv i personave që kryejnë funksione publikë.
Kallëzimet e reja
Po ashtu, paralajmëroi se në SPAK do dorëzohen dosje të reja për ankuat vrasje e mbetur në tentativë ndaj ministrit të Brendshëm Sandër Lleshaj, kryebashkiakut të Tiranës Erion Veliaj dhe Drejtorit të Policisë së Shtetit Ardi Veliu për tentativë vrasje. Ardiana Kalaja tha se do të ketë edhe padi të tjera ndaj kryetarit të Këshillit Bashkiak të Tiranës, anëtarëve, për shpërdorim detyre lidhur me vendimin për shembjen e teatrit. Padi u paralajmërua dhe ndaj ministres aktuale të Kulturës dhe paraardhëses së saj si dhe drejtorin e TK për “masakër ndaj inventarëve të teatrit”.
