Aleanca për Mbrojtjen e Teatrit i është drejtuar me një thirrje të fortë prokurorisë që të zbardhë pa humbur kohë atë që e cilësojnë si aktin terrorist të shembjes së Teatrit Kombëtar.
Përmes një deklarate, e cila u bë publike në protestën që po zhvillohet, AMT thekson se ka depozituar në SPAK dy kallzime penale ndaj Erjon Veliajt dhe Arbi Maznikut, por ende nuk ka asnjë reagim.
“Nëse drejtësia nuk vepron për të zbardhur aktin terrorist, atëherë qytetarëve i lind e drejta për të mbrojtur veten dhe pronat e tyre”, thuhet në deklaratën e AMT.
Sipas saj, faktori ndërkombëtar po reagon me shpejtësi lidhur me situatën e krijuar, dhe kjo po ndodh për shkak të qëndresës sonë.
Sipas Budinës, “faktori ndërkombëtar po reagon me shpejtësi të skëterrshme për atë që po ndodh në Shqipëri, moto jonë është jo “ik ik”, po “eja eja”, ai që duhet të ikë duhet të iki vetë”.
“Ne akuzojmë direkt kryeministrin Edi Rama, kryetarin e nënkryetarin e Bashkisë, drejtorin e Teatrit Kombëtar, këshilltarin e Bashkisë, Ministrinë e Kulturës, që me veprimet e mosveprimet e tyre kanë provokuar atë akt dhune të 17 majit.
Një hap i parë, është ndalimi i çdo punimi në truallin e Teatrit Kombëtar, kërkesa nga ana e prokurorisë e sigurimit të provës, e shpallja e procedimit penal për të gjithë të përfshirët, nëse s´ka reagim të shpejte nga prokuroria, do jemi ne që do kërkojme me forcë.
Ju bëj thirrje autoriteteve të drejtësisë ndërkombëtare të reagojne, vendi po rreshket në situatë pasigurie”, tha Robert Budina në emër të AMT.
