Mbi 20 persona janë arrestuar gjatë një operacioni antidrogë, të nisur orët e para të mëngjesit të kësaj të Mërkurë. Operacioni i koduar “Shënmëri 2020”, u shtri në disa qarqe të vendit si Kukës, Lezhë, Shkodër, Tiranë dhe Gjirokastër, ndërsa çoi pas hekurave mbi 20 persona, mes tyre dhe efektivë policie.
19 persona u arrestuan për veprat penale “Kultivimi i bimëve narkotike, në bashkëpunim”. Mes tyre është dhe vëllai i kryebashkiakut së Fushë-Arrëzit Fran Tuçi, Arben Tuçi.
Personat e vënë në pranga janë Shkëlqim Skacaj, 29 vjeç, Arben Tuci, 50 vjeç, Floriand Myftaraj, 20 vjeç, Pal Pergjergji, 61 vjeç, Akil Buna, 36 vjeç, Arben Bejko, 52 vjeç, Besart Dreni, 27 vjeç, Tarzan Veseli, 40 vjeç, Petrit Pashku, 46 vjeç, Benard Kordhaku, 36 vjeç, Shpëtim Topuzi, 46 vjeç, Zejnel Mece, 44 vjeç dhe Ramiz Cenaj, 24 vjeç, nga këto 10 shtetas janë banorë të Kukësit, një shtetas banor i Lezhës, 1 i Pukës dhe 1 i Gjirokastrës.
Për shtetasit Sali Kovaçi, 41 vjeç, Kreshnik Murataj, 26 vjeç dhe Ardiatik Hoxha, 34 vjeç, u bë njoftimi i masës së sigurisë “Arrest në burg” në IEVP Tiranë, pasi janë arrestuar për vepra të tjera penale.
Gjithashtu në kuadër të operacionit u bë shpallja në kërkim e 3 shtetasve: B. K., Z. M. dhe B. C.
Nga strukturat e SHÇBA-së pranë Drejtorisë Vendore të Policisë Kukës janë arrestuar dy punonjës policie, shtetasi A. K., 49 vjeç dhe shtetasi R. C, 59 vjeç, për veprën penale “Shpërdorimi i detyrës”. Ndërsa për oficerin e Policisë N. K, u mor masa e pezullimit nga detyra.
Efektivët e policisë akuzohet se bashkëpunonim me kultivuesit e kanabisit.
Hetimet
“Dokumentimi i këtij aktiviteti kriminal është bërë pas një hetimi disa mujor nga strukturat e DVP Kukës në bashkëpunim me SHÇBA-në, nën drejtimin e Prokurorisë së Rrethit Gjyqësor Kukës, duke aplikuar format dhe metodat speciale të hetimit, në kuadër të procedimit penal të nisur në vitin 2018, për parandalimin e kultivimit të bimëve narkotike”, njoftoi policia.
Të njëjtat burime, shtuan se operacionit u arrestua në flagrancë edhe shtetasi S. V., 41 vjeç, banues në Shtanë, Kukës, për veprat penale “Kultivimi i bimëve narkotike” dhe “Armëmbajtja pa leje”, pasi gjatë kontrollit të ushtruar nga Policia në banesën e tij u gjet dhe sekuestrua një armë zjarri tip automatik, si dhe në ambientet e jashtme u gjetën 54 kubikë me bimë të dyshuar narkotike kanabis.
