Presidenti i UEFA-s Aleksander Ceferin ka konfirmuar se “Euro 2021” do të vazhdojë sipas planit dhe do zhvillohet gjatë verës së ardhshme.
Në një intervistë me gazetarin e “The Guardian” Sebastián Fest, Presidenti dukej i sigurt se Kampionati Evropian i shtyrë nuk do të hasë në asnjë pengesë vitin e ardhshëm dhe gjithashtu shprehu besimin e tij që shpejt futbolli, do t’i rikthehet normalitetit dhe fansat do të vërshojnë përsëri nëpër stadiume.
“Nuk mendoj se ky virus do të zgjasë përgjithmonë. Mendoj se situata do të ndryshojë më shpejt nga sa mendojnë njerëzit. Aktualisht po kalojmë një situatë serioze por gjithashtu trendi i virusit është në rënie dhe po tregohemi më të kujdesshëm. Dimë më shumë rreth kësaj sëmundjeje dhe në përgjithësi jam një person optimist. Nuk kam këtë vizionin apokaliptik që duhet të presim për valën e dytë apo të tretë të coronavirusit.”
“Ne jemi gati dhe do të ndjekim rekomandimet e autoriteteve, por jam plotësisht i sigurt se futbolli i bukur, ai i vjetri, me tifozët e tij, do të kthehet shumë shpejt. Gjithashtu Euro 2021 do të vazhdojë sipas planit pasi besoj se verën e ardhshme ne do të jetojmë në realitetin e vjetër.”
