Ish-ylli i çiklizmit, Lance Armstrong në një dokumentar të ESPN për të, është rrëfyer për përdorimin e substancave të ndaluara gjatë karrierës së tij.
Armstrong tashmë 48-vjeç, gjatë gjithë karrierës së tij kishte mohuar përdorimin e çdo lloj substance që rriste performancën e tij, por diçka të tillë e pranoi në janar të vitit 2013 në një intervistë me Oprah Winfrey, një vit pasi ishte vërtetuar se çiklisti kishte përdorur doping.
Sidoqoftë, në dokumentarin e ri të ESPN, 48-vjeçari konfirmoi që historitë e tij me substancat e ndaluara kishin filluar që në moshën 21-vjeçare, në sezonin e parë të tij si profesionist.
Armstrong, në vitin 1996 u diagnostikua me kancer në testikuj dhe rrezikoi jetën. Gjithsesi në fund ia doli të shpëtonte dhe më pas themeloi edhe një fondacion për të ndihmuar ata që shpëtojnë nga kanceri. I pyetur nëse përdorimi i dopingut ka lidhje me sëmundjen e kaluar, Lance nuk di të japë një përgjigje të saktë.
“Nuk mund ta di me siguri nëse nga ndonjë lidhje mes dopingut dhe kancerit, por sigurisht nuk mund ta përjashtoj. E vetmja gjë që mund të them është se hera e vetme që kam përdorur hormonin e rritjes, ka qenë në vitin 1996. Në sezonin tim të parë si profesionist po merrja kortizon, por EPO ishte nivel tjetër”.
“Hera e parë që kam përdorur substanca? Mendoj se rreth moshës 21 vjeç. E dija se çfarë po ndodhte. Unë gjithmonë pyesja, gjithmonë e dija dhe gjithmonë i merrja vendimet e mia vetëm”, është shprehur Armstrong.
Pas hetimit të Agjencisë Anti-Doping të Shteteve të Bashkuara të Amerikës (USADA), Armstrong-ut iu hoqën të shtatë titujt e tij të “Tour de France” dhe u përjashtua përjetë nga bota e çiklizmit.
