Përpara se Bundesliga të ndërpritej, Robert Lewandowski po përjetonte sezonin më të mirë në karrierën e tij. Sulmuesi polak kishte tundur rrjetën 39 herë në vetëm 33 ndeshje, shifra këto që jemi mësuar t’i shohim vetëm nga Messi dhe Ronaldo.
Ndërkohë rikthimin në lojë pas një izolimi thuajse 2 mujor, 31-vjeçari e festoi me një rekord. Në fitoren 2-0 të Bayern, polaku shënoi golin e 40 këtë sezon duke qenë i saktë në 11 metërshin që ekzekutoi pikërisht në minutën e ’40 të takimit.
Lewandowski bëhet kështu futbollisti i parë që barazon rekordin e Lionel Messi dhe Cristiano Ronaldo, duke realizuar këtë sasi golash në 5 sezone radhazi, teksa kanë mbetur edhe shumë ndeshje për t’u luajtur në Gjermani.
Në sezonin 2016-2017, polaku ka shënuar 43 gola, statistikë kjo më e mira në karrierën e tij por që pritet të thyhet me lehtësi gjatë këtij sezoni.
