Kampionati rus i futbollit është programuar për të filluar në datën 21 qershor, por në ditët e fundit rastet me coronavirus në vend po rriten me përmasa të frikshme, aq sa ky virus vdekjeprurës ka prekur edhe futbollin.
Së fundmi në Premier Ligën ruse janë konfirmuar shtatë raste me COVID-19. Fillimisht ishin Jefferson Farfan (Lokomotiv Moscow) dhe Kostantin Pliev (Rubin Kazan). Të tjerët janë nga Dinamo Moscow, që është edhe ekipi më i goditur. Fillimisht mediat në Rusi raportuan se ishin prekur tre futbollistë, emrat ë të cilëve nuk janë publikuar. Veç tyre, më pas pozitiv ka dalë edhe Alexei Pleskov, drejtori i departamentit mjekësor.
“Sport Express” shkruan se tashmë pozitiv me coronavirus ka dalë edhe Dmitry Izotov, trajneri i portierëve. Kjo situatë e krijuar ka bërë që Dinamo Moscow të anulojë për një afat të pacaktuar seancat stërvitore.
