Kryetari i Bashkisë së Tiranës ka justifikuar dhunën policore në protestën e djeshme pas shembjes së Teatrit Kombëtar me vendim të Bashkisë së Tiranës.
Erion Veliaj, nga emisioni “Opinion”, tentoi të përligjë mizorinë e policisë ndaj protestuesve ditën e Diel me shprehjen që nga rilindasit është kthyer në modë, kur bëhet fjalë për të shmangur përgjegjësitë e zullumeve që kryejnë: Këto ndodhin dhe në botë!
Ai dha shembullin e një proteste në SHBA, për të cilën tha se edhe pse ishte mjedisore, u arrestuan protestues. “Nuk është e pazakontë që policia të kryejë misionin e vet”, tha Veliaj, duke anashkaluar plotësisht dhunën policore.
Kryebashkiaku po ashtu u mundua ta largonte përgjegjësinë më tej nga vetja, kur u shpreh: “Unë nuk jam drejtor i policisë”.
Protesta në fakt që pasoi dhunën policore erdhi pas aktit të Bashkisë së Tiranës së drejtuar nga Veliaj për shembjen e godinës së Teatrit Kombëtar.
I pyetur pse nuk ndërmori një referendum para shembjes së teatrit, Veliaj tha se zyrtarisht nuk i është kërkuar nga askush një gjë e tillë. Drejtuesi i emisionit i kujtoi deklaratat e Presidentit Ilir Meta i cili është shprehur pikërisht për kryerjen e një referendumi për çështjen e teatrit. Veliaj u justifikua duke thënë se zyrtarisht Meta nuk i ka dërguar asnjë kërkesë për referendum.
