Sërish tensione në protestën që po zhvillohet në kryeqytet kundër shembjes së Teatrit Kombëtar të dielën, me vendim të Bashkisë së Tiranës, të drejtuar nga Erion Veliaj.
Për të disatën herë, ka pasur përplasje fizike në protestë. Teksa kjo ndodhte, në foltore ishte duke e mbajtur fjalën Edmond Budina.
Ai bëri apel kundër dhunës dhe përçarjes, ndërsa u shpreh se trazirat në protestë i krijojnë provokatorët.
“Jo dhunës! S’mund të lejojmë ca njerëz të na përçajnë, të na ndyjnë! Këtu na kanë futur edhe provokatorë”, tha regjisori Budina nga podiumi i protestës.
Ai bëri apel për mosbindje civile, ndërsa u shpreh se Presidenti Ilir Meta duhet të shpërndajë parlamentin. Po ashtu, bëri apel për protesta ta vazhdueshme, deri në largimin e Edi Ramës nga drejtimi i qeverisë dhe dorëheqjen e Erion Veliaj si kryetar i Bashkisë së Tiranës.
